Протест против војната во „Времја“

На руската државна телевизија, во понеделникот вечерта, во текот на централната информативна емисија – вести – „Времја“ – се случи протест против војната и инвазијата на руската армија врз Украина.

Зад грбот на водителката на вестите, млада девојка влезе во кадарот со табла во рацете на која на англиски јазик беше напишано – „Не на војната. Запрете ги војниците“, а под него на руски – „Не и верувајте на пропагандата. Овде ве лажат“!

Случај без преседан

Станува збор за случај без преседан во руската и во советската пракса, во годините на советскиот комунизам, каде сите вести и информациите секогаш строго се проверуваат, а пристапот до ТВ студијата е максимално обезбедуван. Но, овој случај, што го одбележуваат и руските медиуми и за кој како доказ постојат бројни фотографии, покажува дека никогаш досега во Русија (и во времето на СССР) отпорот и спротивставувањето кон една руска воена инвазија врз друга земја – не бил волку голем и силен.

Храбрата млада жена е Марина Овсијаникова која работела во телевизијата и во програмата „Времја“, како еден од уредниците.

Емисијата Вести на првиот канал на државата телевизија е под строг надзор на Кремљ. И, во „нормални“ прилики каналот е строго контролиран, кога станува збор за односот кон власта и околу изнесувањето на вистинската слика за Русија.

Сега, меѓутоа, по започнатата агресија на Русија врз соседна Украина сите вести и информации за состојбата на фронтот и за руската инвазија се под остра цензура и силна контрола на се она што се емитува за и околу украинската војна.

Порака за руската јавност

Сето она што и се пласира на руската јавност мора да биде само руската верзија за војната и за случувањата на боиштата. Во такви услови, јасно дека нема ништо за  злосторствата на  руската армија и за тешките разурнувања, како и за освојувањето на туѓа територија. Не само што нема слика и извештаи  за она што навистина се случува, туку за руските гледачи не се употребува ниту зборот -војна.

Уредничката на „Времја“ веднаш потоа е одведена од полицијата и ставена во притвор. Била испитувана цели 14 часови.

Инаку, освен таблата со која има влезено во кадарот додека се емитувале вестите, се слуша и нејзиниот глас во директно емитуваната програма, па руските гледачи не само што можеле да ја видат протестната порака, туку и да го слушнат коментарот на  новинарката.

Иако тоа траело кратко време, пред програмскиот директор да го прекине емитувањето на вестите, пуштајќи снимен и прочистен филмски материјал.

„Се срамам што станав Зомби“

Пред протестот, Овсијаникова има снимено и оставено видео на кое случувањата врзани за војната во Украина ги оквалификува како „криминал“ и како „воено злосторство“, изјавувајќи дека се срамува што работи за – како што има речено – пропагандата на Кремљ.

„Се срамам што дозволив да им прикажувам лаги на луѓето на телевизиските екрани. Се срамам што дозволив да ме претворат во Зомби“ – има речено во видеото оваа уредничка на „Времја“, повикувајќи ги притоа луѓето да протестираат против војната за да се – „запре ова лудило“. Па, не можат сите да не стават во затвор- рекла Овсијаникова

Состојбата во медиумската сфера во Русија која и пред војната беше исклучително тешка, сега, со воведената  цензура и со новите сурови законски мерки кои ги применува службата Роскомандор, е максимално влошена.

Весникот  „Новаја Газета“ , на пример, кој ја пренесува веста за инцидентот во „Времја“, не може да го цитира она што, инаку, гледачите го имаат видено и слушнато. Од сликата што го обиколи светот , од протесниот плакат е тргнат текстот!? Од страв  дека уредниците ќе завршат во затвор.